PRESS RELEASE
NO.87/2024
CHAKHEI, 9 Phiata, 2024, Pakhynoh – Atanoh my dawh 10:00 AM kha ta MTP Branch: Chakhei zy ta MTP â dua tawhta kô 70 a tlohna ngiana châ ta Chakhei MTP Opi kiapâh liata Lôbô ama taopa cha Puhpa Albert TT. Sachu, MDC, Chakhei biatuhpa ta a pahy.
Pahyna Programme taopa liata Puhpa K. Zawhana, President, MTP Branch: Chakhei ta chhihtha ta, Pro. Pastor Chhuabei Hlychho, ECM Chakhei biatuhpa ta Hlazy 126:3 nata Esthy 4:14 reina, reipakawhna nata thlahchhâna hneipa ta devotion a hmâh.
MTP Branch: Chakhei Hlapy ta Lôbô pahy châta a rônah kawpa ta ama paryh.
Lôbô a pahy khai tawhta Puhpa Albert TT. Sachu, MDC chata biereina chyupa daihti hmâh ta, atanoh liata tovyuh pha kawpa a pietuhpa MTP Branch: Chakhei leader-zy hnoh ta alynabie reih ta, atanoh daihti liata Mara Thyutlia zy kao totie liata hmahsiena miah tlôkheituhpa eima Missionary RA. Lorrain nah nôvah nah hleikhô ta MTP apaduatuhpa Puhpa Valua Hlychho zy atheina nata zana hlâna a hnei.
Puhpa Albert TT. Sachu, MDC chata bierei pazaona hnei ta, “he MTP Platinum Jubilee Lôbô a vaw y thei nawpa ta tha nata zâh avaw thyutuhpa zydua nata MTP Leader zy hnoh ta alynabie ei reih; he Lôbô he pawpi hawhta vaw pawh sa la, sapa liata reiraohna miah tlôkheituhpa châ sala, he Lôbô he Chakhei sawzy thlalôhna miah pietuhpa châ mawh sy.”
“Sapa & Thlahpa liata MTP he eimâ pahniehna a châna hawhta chhie noh pha noh liata member-zy he hmia miah a sahpa via lymâ u la, member-zy ta MTP sôna pahnopa ta leader zy tha patlô via lymâ awpa he a peimawh kaw. Khihsawzy chhao ta MTP eima hneipa sôna nata a peimawhna pahno thieh heih ei suh u.”
“Khazohpa khozie hawhta Chiehleipazy baona kyh liata MTP he nô & paw vaw châ via lymâ sa la, MTP ta Pari theipa â dyuhna kyh liata zawpizy ta tha patlô lymâ suh u.”
“Chakhei sawzy he, eima nôpaw chhâ tawhta khih reiraohpa, sa nata lao zy sai ahei laih lymâpa; sawhkhâ raihriapazy ta râhvâ O a dia mâh leipazy hnoh ta abao akhâ laihpa châ pi ta, Chakhei râh leilô liata lyutao nawpa râhmâh pahpa y vei hra sala, niebawzy Khazohpa ta miah pazao lymâ ta, ato a phahla leipa ta miah apazaotuhpa eima Khazohpa apahnopa châ pazao lymâ awpata akhokhei pi ta, duahmo sâh viapazy liata miah a sona daihti liata apalai leipa ta a reisi kawpa ta Khazohpa eima reithai awpa a châ” tahpa ta pasyuna nata khokheina bie pha kawpa reih ta, atanoh MTP Day he apha kawpa ta ahmâ chyu awpa ta MTP manôh zydua hnohta khokheina a hlâ ei.
MTP he kô 1954 liata paduapa a châ tawhta, a kô 4-na kô 1958 liata Chakhei liata MTP Branch he paduapa vaw châ ha hra ta, atahmâ he term 41 a sie ngâ hai. He branch tawhta branch sâ 2 Chakhei-II nata Chakheitlâh paduapa châ ta, kô 2016 liata Sub HQ pahypa a vaw châ hrapa a châ.
He Lôbô pahyna liata All NGOs, Awnanopa nata VC nahzy hruapa châ ei ta, kô uhtheina lâta kô 80 a tloh hapa nata a khô hapa,MTP Branch: Chakhei ôna chhôh liata manôh 17-zy hnoh ta palyupalihna hlâpa ama châ hra; cha nahzy cha:-
Pihnô/Puhpa-zy: C. Saiche, C. Neima, Sithle Chozah, C. Ngoche, C. Ngomai, C. Mathlie, T. Bietha, K. Isaih, K. Hepaw, FC. Nauzei, S. Zeihne, B. Chethlie, CH. Sike, K. Hnieche, C. Zeinau, AZ. Tokua, AZ. Laikai.
Daihti chhâna liata Machâ BH. Sibei, Awnano Hyutuhpa, ECM Chakhei Local Church ta thlahchhâna hneipa ta Lôbô pahyna programme he khawpa a châ.
Puhpa Albert TT. Sachu, MDC he BJP District HQ, Siaha tawhta Puhpa Thychha Chozah, Secretary nata Puhpa Thatha Khaimeichho, Gen. Secretary (Kisan Morcha) zy ta kaw zi ta, officials tawhta Puhpa Beirôkhu Beitâ, I&PO nata Ngoko Chozah, Volunteer Assistant ta ama chakaochahlâh.
ISSUED BY:
Information & Publicity Department
Mara Autonomous District Council
Siaha.
