Tanoh, târi 07/06/2023 pata MTP Sub Headquarters: Phura, MTP Branch: Pala nata MTP Branch: Phura âpakaoh pata Phura to Pala PMGSY Road Repair ngâhaipa mopadona hneipa a châ. He lâpi mopadona eima hneina chhâpa cha, Pala nata Phura khih chyhsazy tawhta complain a y hluh kawpa vâta a châ.
He Phura to Pala PMGSY lâpi he Puhpa M. Chakhu contract châ ta, Lâpi mopadona report cha a ry liata eima vaw palâsapa hawhna he ta a châ:
1) Repairing ama taopa he a chhie ngaita kaw. Balu nata cement ngâlâh (rawra ahlao rai leipata) ta vaw plaster ei ta, a chhana (thickness) cha kupazô miakha tluta châ ta, ama plaster chhiehpa cha chakhiapa châ ta, â huary ngaita kaw. Eima hmôna dâh liata he repairing ama taopa he thlakha hleikhô âdaih awpa châ vei. A lâpi ama pazupa chhao mih leipata, a chhiehru ngaita kaw.
2) Construction ama siekhei ngâno tawhna khata Puhpa M. Chakhu he, Pala MTP Branch nata khitlâh zawpizy ta ei hluhpi adaoh ei ta, a pha thei chaina dâh hawhta taopa awpata vaw haw tyh ei ta, lâpi phapa ama khoh hrapa vâta sa thisaih taih ta ama vaw palo hapa a châ. Puhpa M. Châkhu tawhta achhyna reikah pha kawpa dao tyh hra ei sala, ama lâpi taopa cha pha pyly leipata, ama lâpi taopa ama patlô raoh pata âraona su chhao hmô awpa a hluh ngaita kaw. Tahmâ he, repairing vaw siekhei heih ei ta, new construction hlâta a lie ta a chhie via heih. He vâna he ta, MTP Sub Hqrs: Phura chhao ta pha tah leipata Branch miano (2) zy chhao ta mopadona eima vaw hneipa a châ.
3) Ama Work Manager ta maniah a chho dâh liata cha, tahmâ ta repairing ama siekhei ngâhaipa he Contract Security Rs. 50 lakhs tawhta taopa châ ta. Ama raihria nawpa châta Cement he 160 bags hmâpa a châpa hawhta a reih. A yzie cha, tahmâ repairing he, men power zydua taih hisâ pata Rs. 5 lakhs rachhôh ngâlâh ama hmâh nata pangiasa âchhih. Repair awpa a hluh kaw nota, a rakhapa ngâlâh tao ei ta, tahmâ he cement nata balu a chhâ hapa vâta hria khai hapa hawhta reih ei ta, mystery zy chhao tanoh kha ama sie khai hapa hawhta ama manager ta maniah a chho.
4) Lâpi mopadona eima hnei khai tawhta Pala khih lâ ngai pita, Pala MTP Opi liata Joint Committee thlai hneipazipa a châ. Joint meeting ta bie a pathlupa cha: (1) MTP General Headquarters lâ tlôkheipa châsala, âmo lâ tawh chhao ta hmahlana thlai maniah hneipa thei ei sala tahpa ta pathlupa a châ. (2) Puhpa M. Chakhu, Contractor hnohta châ ropata paphaopa châsala, he repairing he âthaona tawhta a pha thei chaina dâh hawhta taopathi awpata chhopa châ mawh sy tahpata a vaw pathlu hra.
Puhpa M. Chakhu he chyhsa sia kawpa châ ta, keimo MTP Sub Hqrs: Phura nata Notla Bia zawpizy ta a chô liata hnabeiseihna lai kawpa eima vaw hnei tyhpa a châ. Anodeikua, tahmâ he hawhta eima siena lâpi maniah a taopa thlâh hapa he no-âh tah pita, pei chhao eima tah ngaita kaw. Pala to Phura lâpi he notla lâta khih a ypazy a hluh viata eima hmâphahnai ngaita kawpa châ ta; chavâta, a pha awpa eima khoh kawpa a châ hra.
MTP Sub Hqrs: Phura ta, he lâpi he taopathipa a châ hlâ lei cha, âchalih leipa aw ta, a peimawhna dâh lymâ hawhta thatlô kawpata â laichadai pazi lymâ hra aw.
By
General Secretary
MTP Sub Headquarters : Phura.
