Puhpa M. Laikaw, CEM ta MTP Gen. Hq. Siaha Official Website (www.mtphqsiaha.org) a pahy haw.
SIAHA 23 Hmypi, 2023 (Pobienoh) – Atanoh dawh 1:00 Pm khata Puhpa M. Laikaw, Chief Executive Member, MADC Siaha ta Environment & Forest Department, MADC Siaha Hall liata MTP General Headquaters, Siaha Website (www.mtphqsiaha.org) a pahy.
Programme he Puhpa Solomon N. Beihlotha, Asst. General Secretary, MTP Gen. Hq. & Admin IT Cell ta chhitha ta, Rev. VL. Ngaia Hlychho, Sr. Executive Secretary, ECM Siaha ta Devotion â hmâ khai tawhta Puhpa M. Laikaw, CEM chata MTP Gen. Hq Website www.mtphqsiaha.org cha aly kawpata a pahy.
Website pahyna a hnei khai tawhta CEM chata biereihna hnei pazao ta, ‘Atanoh programme â vaw hlaopa zydua SAMAW eicha hlâ ei. MTP â vaw dua thao nohtapa pachâ tacha atahma duasu liata cha â vaw sosa kaw ba pita, Website pahy thei awpa taihta eima vaw ypa he ei ly ngai ta kaw. MTP he hmopha leipa adyuh awpa châ pita, eima râh liana heta paritheipa Drug ta thâ ta mania angiathlu ta, he he thapi phiata eima dyu awpa a peimaw ngâ sa.
Khizaw liata Mara sawzy eima lalua thei nawpata Information Technology he hmapasiesa awpa he atahma khizaw lia châ hmo peimaw kawpa a châ. Eima hmotaopazy, eima hmalanazy he khizaw zydua hmô pata eima palâha thei nawpata tiama papua chyu si la, ngâchhina nata âdohna chhaota raih eima hria awpa he hmo peimaw kawpa a châ. Raih eima hriapa he hria chakhy thlathli leipa ta, Mara râh hmasie nawpa pachâ pata paloru hmeihseih ta hria si la, chhâ vaw y awpa zyta he Mara râh he thapha kawpa nata thlalô kawpa ta ama vaw pahra thei nawpata Mara râh thiepa (New Maraland) padua awpata hma eima la awpa a peimaw ngâ sa.
Eima chi nata pho pabohsa awpata MTP heta thapi phiata hma la awpata châ haw ei nata, eima ti nata râh he a leidia thla lei nawpata palôru miakha phao pata hria chyu awpata châ haw ei nata, khokheina sâh chaipa eicha hla ei tahpa ta bietahna a reih.
Puhpa Israel Chozah, General Secretary, MTP Gen. Hq ta IT Cell, MTP Gen. Hq vyuhpata CEM hnohta alynabie rei nawpata Momento angia kawpa hlâna a hnei.
Puhpa Pakhaw Choza, President MTP Gen. Hq chhaota biereihna hnei ta, Puhpa T. Beihronga, A&C Secretary & Chairman IT Cell Project Team, MTP Gen. Hq ta Website Summary reihna a hnei hra. Puhpa KT. Beimokhai, Admin IT Cell Project Team, MTP Gen. Hq ta alynabie reih ta, daihti pachhâsapa a châ.
